1. Farai un vers de dreyt nien :
2. Non er de mi ni d'autra gen,
3. Non er d'amor ni de joven,
4. Ni de ren au,
5* Qu'enans fo trobatz en durmen
6* Sus un chivau.
7! No sai en qual guiza'm fuy natz :
8. No suy alegres ni iratz,
9- No suy estrayns ni suy privatz,
10. Ni no'n puesc au,
11. Qu'enaissi fuy de nueitz fadatz,
12. Sobr'un pueg au.
13! No sai quora'm fuy endurmitz
14. Ni quora'm velh, s'om no m'o ditz
15. Per pauc no m'es lo cor partitz
16. D'un dol corau.
17. E no m'o pretz una soritz,
18. Per sanh Marsau !
19. Malautz suy e cre mi murir,
20! E ren no sai mas quan n'aug dir.
21. Metge querrai al mieu albir
22+ E no sai cau.
23* Bos metges er s'im pot guerir,
24+ Mas non, si amau.
25- M'amigu'ai ieu, no sai qui s'es,
26+ Qu'anc non la vi, si m'ajut fes.
27. Ni'm fes que'm plassa ni que'm pes,
28. Ni no m'en cau,
29. Qu'anc non ac Norman ni Frances
30. Dins mon ostau.
31. Anc non la vi et am la fort,
32. Anc no n'aic dreyt ni no'm fes tort.
33. Quan non la vey, be m'en deport,
34. No'm pretz un jau,
35. Qu'ie'n sai gensor e bellazor,
36. E que mais vau.
37- Fag ai lo vers, no sai de cuy.
38. Et trametrai lo a selhuy
39. Que lo'm trametra per autruy
40. Lay ves Anjau,
41+ Que'm tramezes del sieu estuy
42. La contraclau.
